Ugai Ítha ndímúganíre;

Tene tene múno rí, ríría mítitú yarí mínene na mítumanu na iriti nyingi citiaunítwo ní kwarí na itúra bururi-ini wa Gíkúyú ríetagwo Múnyútha ríari ríthaka amú ríari gítuamba-íni na mwena wa íthúíro kwarí húgúrúrú-íní cia mútitú múnene múno wetagwo Gatumu na ríahakanítío na mútitú úyú ní karúí gathereraga na ítherero, na hau ního marímú makínyaga ríría mahítaga útuku.

Mahinda-ini macio, níguo o múndú ní ataúkítwo ní wíra wake, írera ría kíroko ime ría itíka, atúmia ní matumaga ríigú cíana na athúri ao na makohera túhií kamúndithí nígúo ríría maríthií rúuru mone gíakúría.

Múthenya úmwe ota mútugo, ríría riúa ríahiúhíríe cíande, túhií twa ítúra ría Múnyútha, ní twa hingúríire ng’ombe na mbúri o múndú cía íthe magíthií nacio kúrííthía mútítú-íní wa Gatumu makíhuhaga íhuní nacio ng’ombe ígathií ígambítie mbugi…

Ríría túhií twakinyire rúuru ní twarííthirie mahiú o ngínyagía ríría matwaríre mahiú iriúko cíkínyua maaí ígícokagía íthagumia.

Ríua ríaíkia húho, túhií tútú túkíírana túingíre mútitú wa Gatumu túgatúe matuya mútúya-ini úmwe werikanaga ní wa irimú ríetagwo ria nyakondo warí matúya me cama múno.

Mútitú-iní uyú wari na marimú manene múno maría makomaga múthenya nario ríua ríathua magokíra kúhíta.

Túhií nítwamenyaga úguo na túkííngíra kíríti twíhíkíte níguo tútígakorererwo kúu ní marimú.

Ríría makinyire mútúya-ini úyú na makíhaica, makiírana mathake múthako wa gútua matúya mahingíte maítho mone núú wí múnyaka wa gútua matúya meru.

Ní magítuíre matúya na íhenya amu nímetígagíra gútígatuke me kíríti-ini kía marímu. Ríría maíganirie, magícoka íhenya rútere-ini haria matigíte ng’ombe na mbúri.

Makinya makíírana o múndú onaníe matúya make, hari túhií twothe túna, harí kamwe getagwo Karura úría nowe tú warí na matúya meethí. Túhií tútú túngí túgíthekerera Karura múno makímúría atírí,

“Kaí Karúra wí múkigú atía, kaí útúíre matúya úhingíte maítho?”

Haú ního Karura amenyíre atí túhií tútú túngí tútinahinga maitho magítua matúya atí nowe tú úkúhíngíte make.

Karura ní aígwíre uru múno ní kúhenio ní arata ake agítúa na ngoro no múhaka athií atúe make meru, arata ake makígeria kúmúthaítha ndagacoke mamúgaíre matúya akírega koimana na agítonya kíríti ringí.

Makenga aríithi nímo Karura akínyíríre mútúya-ini akíhaimba narua agítúa matúya maigana úna narua na orírí atua ría múíco rí akíígua makínya maínaínagía thí ta gwí gíthingithia, Karura akíumwo ní gathígino gaceke.

O rímwe akíígua kworío atírí,
“Núú úcio uraíya matúya makwa?, Harúrúka narúa!”

Ríría Karura oímíre irimú ría nyakondo ríkímúoya ríkímúikía mondo-ini nene múno ríkimukuua na rígítheca njíra ríithíe mútitú úngí kwí marímú aratawe makarúge Karura hamwe.

Ríathianga rírí kíng’aratua-ini ní ríanyotíre na ríkíona múcií rígítonya ríkíhoya maí.

Mútumia mwene kuo warí múkúrú akííra Nyakondo gútírí maí na akíriíra írímu riri handu he íríuko rínyue na rírehere mútumia maí ma kúruga.

Írímu ríaneyo kabúthú ríoimagara, mútumia akíbaara kíría kíarí mondo akíona atí haarí na kahií ho thíini.

Mútumia úcio o narua agíkaruta agíkahítha rungu rúa úrírí. Agícoka akíoya ihiga ría úkiíro agííkia hau mondo-íní akíoha wega.

Tondú ní gwatukite na írímu rítíendaga gúcererwo ní rúgendo, ríacoka no kabúthú ka maí ríaígire thí ríkíhuria mondo yarío rígítheca njíra o ríngí.

Ríría irimu ria nyakondo riakinyire mútítú-íní ríatonya kíríti rígíthií ríkíanagirira ríkíínaga atírí;

🎵 O wa karúkú-í,
O wa karúbengerecú-í,
Ní ndehete íruga-í
Mwaki úgwate-í 🎵

Namo marimu maaigua makíúngania ngú nyingí nígúo mathií makarie íruga ríu ría wathiomowe.

Ríría ría Nyakondo ría kinyire, magíakía mwaki múnene múno makiírana atiri,

“Mwaki waneneha, mondo ino túkúmíikia riiko itarí ndumúre ní getha kanyamú kaú karí ho kahie wega”

Riria mondo íyo yaíkirio rííko, marimú makiírana atírí,

“Kanyama kaú o gakíhíyaga rí, ní wega túgerie kúruga mwaki úyú, úría úkúrúga mwena úria úngi níwe úkúria kanyama gaka karahía”

María marí marúgaga makaremwo magúaga makahia magacura, maria mangí mona úgúo magatheka ta ngwa makaúga atirí

“Wathiomo aarío no múrío.”

Marimú maría matatú matígaríre na mahotíte kúruga makírúta íhíga ríría ríahíaga ní mwaki.

Na tondú mwaki wari múnene rí,
ihíga rírí ríatúkíte maíta matatú na rígatúíka rítúne o ta nyama.

O írímu ríkíoya gícunjí kía íhiga makímería magícíría ní nyama.
Thútha wa mahinda manini, makiambia kúhía nda ní mahíga macio.

Marímú macio ní makaíre na rúo rúnene múno ngínyagía andu me matúúra-ini mageciria ní ngwa na marurumi,

Marímú macio ní makuíre mothe o tíga kamwe kari na coongo na ríari na mbaco na karegire kúruga mwaki.

Rúgano rwakwa rwathírira hau!