Ugai Itha Ndimuganire,
Tene tene muno ri, Cucu wa Cucu witu atanaciarwo ri, Waruhiti na Warugogo ni mari na ndugu nene muno ta gikwa na mukungugu, no ni gwakinyire handu ndugu yao igithira na igicungirira waruhiti aunike maguru meri ma thutha na nikio nginyagia umuthi ruciaro rwake ruturite ruthuiiriire, riu ngwenda mutege matu ta mbawa I githaka-ini ndimuganire rugano rwa Waruhiti, Thegere na Warugogo niguo muture mumenyete bata wa gwiciragia keeri na mukahotaga gucagura arata ega.
Muthenya umwe ni wakinyire na Thegere ari wathi-ini wake agitungana na mwatu mwega uihurite njuki na uki no kwinyururukira,agithi hwa-ini kwa muratawe Waruhiti akimwira atiri, hena handu onete uki muingi muno mangirianira nake tondu ni wathiomowe na tondu njira ya mundu umwe ithiagirwo gutuka ri, Waruhiti agitikira guthii githaka-ini kiu makarie uki.
Riua rikiratha ni mokirite na magituma thabari na riria ime riarikagia guitika, ni makinyite hau mwatu-ini ucio uria wari muti-ini muraihu muno, Thegere niakirire uguo agikira Waruhiti atiri, “Wathiomo, Uki uria wi haria iguru ti uki ta uria ungi, uyu wi na cama muingi ma, ona no ugwature kireru, uki ucio wina murio uria utamiagwo”
Thegere ni erire Waruhiti ati angienda arie uki ucio na ature aigute cama waguo areke amutume na thutha niguo ndakanamie murio ucio, Waruhiti kuigwa uguo ri agitikira, Thegere ni oire muigua na uthi na agituma Waruhiti rutumo na thutha na agicokereria.
Riria arikirie gutuma. Thegere nia tambire muti ucio iguru na akiambiriria kuumbuthura njuki, nake Waruhiti agitigwo hau gitina-ini kia muti akagie mwaki.
Riria Thegere ahingurire mwatu ucio niakorire uki mwega ma na akiambiria kuria uria mwega mwega, o arikia kuria karia kega ri, ni aikagiria Waruhiti magua na maana nake akamaria na ukoroku muingi muno.
Na riria marikirie kuria makiigania ni meranire macoke na mucii, no matanathii haraihu ri, nda ya hiti ikianjia kurarama na kugamba ta marurumi, nda yake ni yarikitie guthuka thutha wakuriania mathuuro ma uki,magua na maana maingi muno, riria ageririe kumia niguo nda yake ithere ni aremirwo amu ari na rutumo na thutha.
Waruhiti ni anjiriirie guthebea na ruharo rukiruga ma nda ini yake, akiremwo ni guthii na akihuruka handu kahiga-ini akira muratawe Thegere amutumure na thutha niguo ahote gwiteithia, Thegere no kugwa aguire na mitheko na akira Waruhiti eringie ni rwa nyaririna Thegere akiinukira agitiga Waruhiti akue kahora ena ruo ruingi muno.
Mathaa ni mathiangire o nginyagia mathaa ma Miarahuko Waruhiti atigitie kamuoyo ka nguku atumukane ri, Wakagogo ni ahetukiire hau agikora Waruhiti eyaraganitie agikia thari agikumuria atiri,
“Murata wakwa Waruhiti nikii kiuru wakoma na ngara na waikia thari?”
Waruhiti ni ahehereire Wakagogo akimwira atiri,
“Nii ni gukua ndirakua,thii na nyunjuri wakwa undumure rutumo ruo ndumitwo”
Wakagogo ni aringirwo ni thaa cia murata wake na akinita muthia wa ruririgi ruo na mukanye wake na agitumura Waruhiti, no riria arikirie uguo, ruharo ruingi muno ni rwaumire ta kiguo kiunite na gigithika Wakagogo nginyagia akiaga. Waruhiti ni undu wa Kuhumaka ri ni aminjukire ta mugwi ni gukena na nyingi athii akarumie Thegere mbaara ni kwenda kumuraga, Waruhiti ona ndaririkanire Wakagogo uria wamutheithia ni muthike ni ruharo rwake.
No munyaka wa Ngai ni wakorire Wakagogo atanoragwo ni kirima kiu kia ruharo, ni kwa urire mbuura nene muno na igithambia na guthereria giko kiu kia Waruhiti na Wakagogo akihonokera hau.
Thutha wa matuku matari maingi,Wakagogo akiumbuka na kuriunga bururi-ini ucio wao, ni acemanirie na Waruhiti ahurukite aikitie matatha ni gukihuna, riria Waruhiti onire Wakagogo akimugeithia wega muno ona ta gutari undu urahanikite, o mari miario-ini iyo ri Wakagogo ni erire Waruhiti ati kuuma matigane ni onete kundu kwina nyama nyingi muno kuuria matu-ini,
“Waruhiti, tarora kuuria iguru, icio urona ni nyama ci ina maguta maingi muno, ucio ni weru wa matheco, ndirari kuo ira ndiraria na ndona tondu wi murata wakwa ngwirire niguo onawe ucicame wiigwire cama”
Riria Waruhiti aigwire uguo ri no mata manjiriirie guitika, Wakagogo akimwira atiri, ni wega ere mbari yoothe ya Hiti magathii Wakagogo amatware matu-ini kundu kwi weru wamatheco na makibangana makarokanira kiroko niguo matume rugendo.
Waruhiti ni athire akiungania hiti ciothe na akimabanga muhari umwe wari muraihu muno, o hiti yanitite mutingoe wa iria iri mbere yake, no hiti imwe yari kionje yaregire guthii weru ucio wa matheco.
Riria Wakagogo akinyire akimoria kana ni mebangite na mihuko ya gukuua nyama,na hiti ciothe cigitikagwo ni mata cigitikaniria,Wakagogo agikira murata wake Waruhiti amunite karuoya gake nake anitwo ni hiti icio ingi mutingoe niguo manjirire thabari.
Thutha wa kumbuka gwa kahinda hiti ni ciagiriire rwimbo iguru,
Twathi kuria iguru ae,kuria mathunya ai
Na maigwa mathunya ai, ni nyama iri murio ai
Twathi kuria iguru ai,kuria mathunya ai
Na maigwa mathunya ai, ni nyama iri murio ai
Wakagogo ni amatuire hanini akimoria atiri,
“Mbari ya hiti, ni murona thi?
Nacio hiti iria ciari muthiya cikuuga no cirona thii wega, Wakagogo agigithie na mbere na kuambata na iguru, akimoria ringi kana no marona thii,hiti cigikiuga gutiri kindu cirona otiga kibii na marundu rundu
Wakagogo ni amenyire ni ihinda riega ria kwiriharia ni uria Waruhiti endire kumuraga, Wakagogo ni anjiriirie kuina karwimbo atiri,
Karuoya gakwa wi munya munyukire ii,
Na Warega Nduri wakwa
Karuoya gakwa wi munya munyukire ii,
Na warega nduri wakwa
Ihinda riu niguo hiti ciagutukire Wakagogo arenda kumanina, na kubucia kwa ritho ri, karuguoya karia Waruhiti na mbari yake cienitirie gakimunyuka, hiti ciothe cigikianjirira guikuruka mahiga mahiga cierekeire kugutha thi na mururumo, riria Hiti iria yari na coongo na wonje itathiite thabari iyo yonire hiti iria ingi cikiigwa ri ikiuga na mugambo munene atiri
“Mutikanyunange mukiuma weru wa matheco”
Hiti icio ciothe ciaringire thii cigikua cigithira ciothe, na karugano gakwa gathirira hau,
No nyende kumenya niatia mweruta na rugano ruru rwa hiti,thegere na wakagogo
